جوجل بيحتفل.. واحنا معاه (هدي شعراوي - الجزء الثاني)
شفت حضرتك خناقة هدي شعراوي مع مرات ابنها الدون جوان وانكارها لنسب حفيدتها؟
الموضوع كله نشر .. موجود هنا..
https://choosen-articles.blogspot.com/2020/07/blog-post.html
الكلام اللى جاى ده تقدر تعتبره استطراد او شوية معلومات فكه وقعت اثناء سرد الحكاية الأصلية.
بعد 3 سنين صراع في المحكمة بين المحاميين إبراهيم بك الهلباوي وفكري باشا أباظه وردح عوالم بين بنت الأكابر هدي شعراوي وبنت المسارح فاطمة سري حكمت المحكمة بثبوت نسب الطفلة ليلى الى ابوها الوجيه محمد بك على شعراوي.
الظريف في الحرب دى ان مطربة الصالات قررت تستخدم سلاح القانون والمبادئ والخطابات البليغة ذات اللغة الجزلة بينما زوجة الباشا بنت الباشا اغنى رجل في مصر استخدمت أسلحة العوالم زى الردح والبلطجة ومحاولات القتل.. تخيل انت ان في قاعة المحكمة ترد الوجيهة هدى هانم على ادعاء المغنواتيه وتقولها "نعم يا أختى.. احمد يا عووومااااار".. ومش بعيد في الآخر تكون قالتها "يامه أخاف.. يامه اكش.. ميحكومش.. بره وبعيد.. هي هىييييييييييء.. هوءا يا نووووءا" زى سامية جمال كده في عفريته هانم.
من طرائف القضية دى ان الدليل رقم (1) اللى اعتمدت عليه المحكمة الشرعية في إقرار صحة النسب هو الشبة.. البت طالعة نسخة من ابوها.. نفس العينين والمناخير والبق.. لو خراط البنات مشتغلش في البنت دى بجدية.. يبقى مصيرها للانتحار لا محالة.
بيحكي مصطفى أمين في نفس الكتاب "مسائل شخصية" عن مكالمة تليفون وصلت لهدي شعراوي من الملك فاروق.. الحقيني يا هدي فريدة طالبة الطلاق.. وعلى الفور زارت هدي شعراوي فريدة في الإسكندرية وفتحت معاها الموضوع.. لكن فريدة بمجرد ما سمعت اسم فاروق نطت من على الكرسي وكأن لسعها عقرب.. فضلت تهدد وتصرخ وتعيط وانهارت اكتر من مرة.. الست رافضة تكمل العيشة معاه وده حقها.. محدش يقدر يقيم الموقف الا هي.. رجعت هدي شعراوي على مصر تجر الى الملك رفض فريدة الصلح.. هدي شعراوي حبت تطيب خاطر الملك فقالتله "معلش ولا يهمك.. فريدة عندها مرض اسمه هيستريا الطلاق".
فاروق كان عبيط في الحتة دى بالإضافة الى عبطة الأصلي في إهانة ست زى فريدة.. بقى انت عايز توسط حد علشان ميحصلش طلاق.. تقوم توسط فيمينست!!
الجماعة دول أساسي عايشين حياتهم علشان يطلقوا الناس.. بياكلوا عيش من الطلاق وخراب البيوت.. بأى منطق والنبي تتوقع منها العكس؟
وتم الطلاق بالفعل.. وتظهر هدي شعراوي في الصورة بمسيرة نسائية مكونة من 300 عربية تحمل بنات الطبقة الراقية.. هيروحوا يقفوا قصاد بيت فريدة في مصر الجديدة ويعلنوا التضامن معاها ضد فاروق.
الله.. مسيرة وناس بتتشحن في عربيات!!!
هدى شعراوي طلعت اخوان 
يعنى ايه تضامن مع رجل أو ست في الطلاق؟؟
أعضاء جمعية هدي شعراوي نفسهم اعترضوا على الخروج في اى مسيرة لتأييد فريدة.. هذا شأن شخصي لا يمت بصلة لقضية المرأة نفسها.. كمان انتى بنفسك قبل كده قلتي انها مصابة "بهستيريا الطلاق".. ليه جايه تغيري موقفك دلوقتي؟؟
وهنا لعبت هدي شعراوي على اخطر وتر حساس عند اى ست.. المظلومية.. خرم نفسى عملاق في شخصية اى ست خلقها ربنا حتى السويات منهن.. للنساء قدرة فريدة على صياغة ملحمة اغريقية بطولية تظهر فيها التضحية والغدر والحرمان والخيانة من لا شيء.. دوس على زرار المظلومية وعينك مش هتشوف الا النور.. الستات بتستخدم كلمة "ضحيت" كتير اوى.. سنين طويلة وانا بحاول احط ايدى على ماهية التضحية دى بالظبط علشان افهم هما زعلانين ليه.. بس للأسف فشلت.
هدي شعراوي ساقت الجموع من نفس المنطق.. دى ست.. وطالما ست تبقى مظلومة.. ودورنا كلنا كستات اننا لازم نقف جمب كل ست مظلومة.. تمام كده زى ما وقفت جمب مرات ابنها المظلومة بالظبط.. ويسقط الاستقلال وتحيا الثورة وجرب اقف على كرسى وقول اى كلام بصوت هتافات عالي وانت علطول هتلاقى الناس بتهتف وراك.
هدي شعراوي تاجرت بمظلوميتها تجارة رخيصة وصدرت مشاكلها الشخصية للمجتمع.. في الأول صدرت للناس فكرة انها اتجوزت مجبره وهى طفلة من راجل اكبر منها ب 40 سنة علشان الميراث.. بس اسقطت تماما ذكر انها اتطلقت منه 7 سنين كاملة ورجعتله تانى بكامل ارادتها وهى شابة في العشرينات.. صدرت للناس فكرة انه كان بخيل عليها في فلوس ميراثها.. بس مقالتش للناس ان دى قوانين المجلس الحسبي اللى بيحاسب كل وصى على فلوس المواريث حساب الملكين.. صدرت للناس فكرة انها زوجة مقهورة جوزها كاتم على نفسها.. بس مقالتش للناس ان جوزها وضحلها في اول جوازهم كل ما يثير غضبه وانها كانت بتتعمد تعمل كل ما يثير غضبة.
بتحكي سهير القلماوي خبرتها مع هدي شعراوي في رئاسة تحرير مجلة المصرية الناطقة بلسان الحركة النسوية وقتها وبتقول انها لم تجد اى ديمقراطية عند هدي شعراوي لما حبت تخلى مجلة المصرية مجرد ترجمة لمجلتها الأصلية "اجبسيان" الفرنسية.. بتقول الست سهير "حسيت انه اتحاد هدي شعراوي وهوانمها.. مش اتحاد المرأة".
من غرائب القدر في الحكاية دى ان بعد انفصال ابنها عن المطربة.. جوزته واحده من بنات الطبقة الراقية خلف منها كبشة صبيان وبنات.. وبعد فترة طلق بنت الاكابر وراح اتجوز رقاصة اسمها أحلام خلف منها 3 عيال.. يعنى الست هدي مرضيتش بمطربة.. قام ابنها اتجوز رقاصة.. بس القدر كان رحيم بيها لأنها ماتت ومحضرتش المهزلة دى.. صحيح.. اللى ما يرضى بالخوخ.
هدي شعراوي فشلت في تربية ابنها.. وبدل ما تقومه او تلم وراه.. اختارت ظلم الاخرين اللى هي نفسها كلت عيش كتير اوى بكلام الدفاع عنهم..
انا مش غايظني في الموضوع كله الا ان العجل اللى في الصور ده كان دون جوان وبتجري وراه النسوان.
وبيزعلوا لما بنقول مجانين.
تعليقات