جوجل بيحتفل.. واحنا معاه (هدي شعراوي - الجزء الأول)
الست دى أشهر من نار على علم.. مفيش جمعية نسوية ولا اى تجمع نسائي الا ويسجدلها عرفاناً بالجميل.. مفيش محافظه مفيهاش حاجه باسمها.. مفيش اى برنامج حريمي الا ولازم يمسى عليها.. دى حتى فاتن حمامة لما عملت فيلم أريد حلا.. اهدته الى روحها.. ومعاهم حق طبعا..
نور الهدى محمد سلطان.. بنت وحيده على ولدين.. أمها اسمها اقبال.. ست قوقازيه بيضاء وزى القشطة بس للأسف كانت ملازمه للفراش بسبب الشلل.. أبوها يبقى محمد باشا سلطان.. من أعيان محافظة المنيا ورئيس مجلس النواب في أيام الخديوي توفيق.... أرض زراعية قربت من 3000 فدان.. فلوس وحسب ونسب ومكانه اجتماعيه مرموقة في مصر الخديوية.. اذا عديت على المنيا في اى وقت اسأل على أرض سلطان.. ويالهول ما ستلاقى.
اذن نور الهدى محمد سلطان هي بنت من الطبقة الراقية اتعلمت القراءة والكتابة وحفظت القرآن.. بتلعب بيانو وتعرف لغات وكروشيه.. ابوها مات وهي طفلة فاضطرت تنتقل للقاهرة علشان تبقى في رعاية ابن عمتها على باشا شعراوي.. واحد من مؤسسي حزب الوفد وقائمقام خديو مصر في صعيد مصر كله والوصي على أملاك واراضي محمد باشا سلطان بعد وفاته.. والأهم من ده كله انه أكبر منها ب 40 سنه كامله.. اول ما نور الهدى وصلت 12 سنه.. راحت أمها مجوزاهاله... اى نعم الست اقبال شرطت عليه يطلق مراته ام عياله الثلاثة.. لكن بأى منطق نقبل هدم بيت علشان نجمع بين أبو 50 سنة وعيله بنت 12 سنة؟
منطق الفلوس طبعا.. ولكن ما علينا.. اللى يخصنا هنا انها بعد الجواز حملت اسم جوزها وأصبح اسمها الرسمي هدى هانم شعراوي.
في مذكراتها الواقعة في 44 فصل.. قالت هدي شعراوي انها عانت كتير بسبب التفرقة الظالمة من أهلها بينها وبين اخوها في المعاملة.. على أساس يعنى انها هتتجوز في يوم من الأيام وتنتسب لجوزها بينما اخوها هيبقى هو راجل العيلة وكده.. من حظهم الدكر ان اخوها الأصغر منها ب 10 سنين مات قبلها وسابلها جرح نفسي فوق جراح التفرقة العنصرية.. علشان المسكينة تتعقد زياده وحالتها تتأخر أكتر وأكتر.
خدت بالك انت ابوها يبقى مين؟؟
محمد باشا سلطان.. احد اهم خونة عرابي في التل الكبير.. واحد من أهم الأسباب الحقيقية لدخول الانجليز مصر.. الرجل اللى اتفق كل المؤرخي باختلاف ميولهم على انه "خائن".
مش مشكلتها برضه.. محدش بيختار اهله.. هل معنى انه كان خائن ماله حرام انها كمان تكون زيه؟
بالتأكيد لا.. هو اه كل ما نبت من حرام النار أولى به.. لكن برضه يخلق من ضهر الفاسد عالم وولد الزنا خير من ابيه وخير من امه وميصحش ناخد البنت بذنب ابوها.
تمام كده؟
بسبب الظلم اللى هدي شعراوي عاشته في طفولتها وجوازها.. وبسبب أوضاع المرأة المتردية بشده في مصر.. وبسبب سفرها المتعدد الى أوروبا.. وبسبب انها شافت ستات أوروبا عايشين ازاى مقارنة بالمرأة المصرية.. هدى شعراوي قررت تبدأ النشاط النسوي في مصر.. مشوار طويل اوى مع مصطلح اصبح مع الزمن سيء السمعة جدا رغم عدالة القضية.. اكرر تانى.. رغم عدالة القضية..
وبدأت جمعيات حقوق المرأة.
طلبات هدي شعراوي للمرأة المصرية كانت عادلة تماما.. سيبكوا من كل الهري اللى بتسمعوه من فارغي العقل والجهلة حاملي صكوك الغفران.. هدي شعراوي مكانتش بتتحرك خطوة الا بفتوي ومشورة من رجال الأزهر واهل العلم وقتها.. زى الشيخ عبد العزيز جاويش مثلا.
قلنا يا اسيادنا والله عدالة القضية..
طيب.. عملت ايه هدى شعراوي للستات غير انها خلعت "البرقع" وداسته برجليها في حفل استقبال سعد زغلول؟
عملت كتير الحقيقة.. كانت اهم عنصر نسائي في #ثورة_1919.. يكفينا نقول انها صاحبة الشرارة الأولي من قبل نبوية موسى وسيزا نبراوى والشلة دى.. بل نقدر نقول انه لولا هدى شعراوي ما كانت الحركة النسائية في مصر.. هدى شعراوي أسست للجناح النسائي في حزب الوفد اللى عن طريقه حاربت علشان حقوق المرأة..
طيب ايه طلبات هدى شعراوي للمرأة المصرية؟؟
• السماح للمرأة باستكمال التعليم.. لانها كانت ممنوعه من دخول امتحان البكالوريا
• السفور "كشف الوجه"
• تقنين تعدد الزوجات
• حرية المرأة في تطليق نفسها
مش شايف أفورة لحد دلوقتى.. قبل ما تسخن كده وتقول اى كلام بص لبنتك وافتكر ان لولا الست دى كانت بنتك اخرها الإعدادية وتقعد تستنى العدل اللى ممكن جدا ميجيش بسبب اى ظرف.. افتكر كمان ان لحد لحظة كتابة السطور دى ما زالت خناقة النقاب شغالة.. وان كتير من مشايخ الازهر حاليا لم يقروا قطعا بفرضيته.. وافتكر كمان ان الخلع حق شرعى للنساء بغض النظر عن ممارسات القضاء المصرى الشامخ اللى سمح بكل انواع الحرام فى ظل القانون ده.. الاصل ان الست من حقها تطلق نفسها من جوزها لما تكره عيشته..
وبعدين؟؟
بلاش نقول انها حصلت على وسام من موسوليني وانها قالت لأتاتورك في حفل من إياهم "حضرتك أتا شرق مش أتاتورك.. ومش هنقول كمان ان واحد من احلامها – حسب ما حكت في مذكراتها – انها تدخن سجاير براحتها من غير ما تخاف ان الدخان يوصل لغرفة الضيوف في قصرهم وجوزها يزعقلها.. دى اراء يا جماعة.. آرااااء.
خلينا في الحادثة الجامدة دى..
سنة 1924م الست هدي كانت بتحتفل في قصرها بمناسبة ما.. عزمت الاكابر وجابت رقاصه ومونولجات وبوفيه وحاجات من اللى تشرح القلب.. ابنها محمد كان شاب معجباني وكرشه يوقع اتخنها مزه.. حقه طبعا.. ابوه باشا وجده باشا وامه هانم صاحبة عصمة.. فلوس زى الرز والأكابر في بيتهم زى الناموس في بيتكو.. يعنى حلم اى بنت.
ابن الذوات كانت عينة زايغه.. علق الرقاصة من الحفلة وخلع بيها على الدائري.. يوم في التاني وشهر في الثالث.. الرقاصة فاطمة سري كلت عقل ابن الاكابر.. عالمه بقي وتلعب بالبيضة والحجر.. الواد متشقلب معاها في ليالي الغرام لحد ما ليالي الغرام قالتله نفسى في الكابوريا.. خديلك قرشين وسقطى.. اخرس يا متوحش انت فاكرني ايه.. ده ابنك ولازم تعترف بيه.. حقك عليا انا اسف.. هاتى ورقه اكتبلك اعتراف رسمي ان اللى فبطنك يبقي ابني.. خد امضى يا اشول.
وكتب الافندي الاعتراف بخط ايده وبعدها سحل البت وراه في أوروبا وهو بيتهرب منها..
وشمت الست هدى خبر بالمصيبة دى..
عملت ايه بقى بتاعة حقوق المرأة مع مرأة بيحاول ندل انه يرميها بعد ما خد غرضه منها؟
عملت كل حاجه وسخه في الدنيا..
بعتت ببلطجية تضرب البت.. هددتها بتلفيق قضية دعارة.. حاولت تسرق منها الاعتراف.. دفعت رشاوى للقضاة اللى كانوا متابعين قضية اثبات النسب.. وسطت وزراء وباشوات ورجالة القصر.. الموضوع وصل لحد سعد باشا شخصيا اللى رد عليها بقرف وطلب منها التوقف عن المحاولات دى لأن الموضوع ريحته فاحت وبقى مقزز.. آخر ما زهقت وسطت إبراهيم الهلباوي باشا بذات نفسه علشان يقنع البت ان المولود ينسب لراجل تانى ويعوضوها ب 25 الف جنيه ونكفى على الخبر ماجور.
يالهوى.. إبراهيم الهلباوي بنفسه!!! بتاع دنشواى!!!
تخيل؟؟
فاطمة مسكتتش.. اتغاظت من الولية اللى مصدعه المجتمع بالكلام عن حقوق المرأة بينما هي نفسها اول من يظلم المرأة.. وراحت ناشرة كل الحكاية سنة 1927 في مجلة المسرح في صورة مذكرات أسبوعية علشان عقل الهانم بنت الاكابر يطير.
انقسم المجتمع كما هي العادة.. نص منافق اجتمع فيه الجماعة بتوع العلمانية ورجالة القصر ومصطفى بكرى واحمد موسى وأبو جهل وأبو لهب.. ونص بنى ادمين كان منهم النحاس باشا وسعد باشا اللى هدد الحكومة بالإقالة لو استمرت في الضغط على القضاء الشرعي لإنكار نسب الطفلة ومعاهم فكري باشا أباظة شخصيا متطوع – مجانا - للدفاع عن فاطمة سرى.
كان ايه حكم المحكمة بعد 3 سنين؟
اثبات نسب الطفلة لأبوها "عظيم" وحرمان الأم من رؤية الطفلة طول العمر لانها سيئة السمعة "مش عظيم"..
أوووف.. ليه بقى القفش ده؟؟
اصل حضرتك صاحبة العصمة لما فشلت في نقض الحكم.. راحت متفقة مع جوز فاطمة سرى الاولانى انه يستغل الحكم بتاع اثبات النسب ويرفع قضية هو كمان بحرمانها من ولدين جابتهم منه..
وكسب النطع القضية..
وبما أن الأم سيئة السمعة.. فالمحكمة كمان حكمت بضم الطفلة الى ابوها علشان تتحرم فاطمة سرى من كل عيالها.. اللى هي نفس قصة فيلم فاطمة بالظبط بتاع أنور وجدى وام كلثوم زى ما أكد مصطفى أمين في كتابه مسائل شخصية ونشرتها مجلة الشباب "بتاعة الأهرام" بتاريخ 20-ابريل-2017.
طيب هدى شعراوي عملت ايه في البت بما ان ابوها داير على حل شعره في أوروبا؟؟
رمتها في ملجأ.
يعنى هدى شعراوى علشان تتجوز واحد اتسببت فى طلاقه لأم عياله وعلشان تنقذ ابنها حرمت ام من عيالها كلهم.
الجماعة الذكوريين اعداء المرأة دول اعوذ بالله.. حاجه زبالة.
الجميل في الحكاية دى ان راويها ومصدرها الأساسي نقلا عن مجلة المسرح كان مصطفي أمين فى كتابه مسائل شخصية.. عارف انت لو كان الشيخ كشك.. كان بقى في الأمور كلام.. انما اهو.. ربك لما يريد بقى.
بس كده.
تعليقات